(تابع) كلمة الرئيس جمال عبد الناصر، في وفد مؤتمر العمال العرب

          بالنسبة للخطط العسكرية فيه تنسيق كامل للعمل العسكري بينا وبين سوريا، وعملنا حيكون كعمل جيش واحد في معركة واحدة من أجل هدف واحد هو هدف الأمة العربية.

          النهاردة المشكلة مش هي بس إسرائيل، ولكن المشكلة هي من هم وراء إسرائيل، فإسرائيل إذا بدأت بأي عمل عدواني ضد سوريا أو ضد مصر فحتكون المعركة ضد إسرائيل معركة شاملة مهياش معركة محصورة في حتة أدام سورية أو محصورة في حتة أدام مصر. المعركة حتكون معركة شاملة وحيكون هدفنا الأساسي هو تدمير إسرائيل. وإحنا نقدر نعمل كده.

          هذا الكلام يمكن ما كنتش أقدر أقوله من خمس سنين ومكنتش أقدر أقوله من ثلاث سنين ولو كنت مش قادر مكنتش مستعد وأقول هذا الكلام، يبقى كلام فاضي ولا قيمة له.

          النهاردة بعد 56 بـ11 سنة بأقول هذا الكلام لأن أنا واثق وعارف إيه اللي عندنا وعارف إيه اللي عندنا في مصر وعارف إيه اللي عند سوريا. وعارف إن الدول الأخرى أيضاً النهاردة العراق دخلت قوات إلى سوريا، الجزائر حاتبعت لنا قوات، الكويت أيضاً حاتبعت لنا قوات، حايبعتوا لنا مدرعات وحايبعتوا كتائب مشاة. دي قوى عربية وده البعث العربي فعلاً الحقيقي للأمة العربية اللي كانت يمكن تشعر بشيء من اليأس.

          النهاردة لازم ينكشف للعالم العربي ولكل الناس مين هي إسرائيل؟ النهاردة إسرائيل هي أمريكا. أمريكا النهاردة هي المحامي الأول عن إسرائيل وبريطانيا أنا بأعتبر بريطانيا بتتكلم لأن بريطانيا ما هي إلا ديل لأمريكا، بريطانيا ليست لها سياسة مستقلة، ومستر ويلسون زي ما بيقول جونسون، هو ماشي وراه وبيقول الكلام اللي عايزه جونسون.

          الدول الغربية كلها بتأخذ وجهة نظر إسرائيل. خليج العقبة كان مقفول الأول سنة 56 وكنا بنفتش المراكب الإنجليزي والأمريكاني والفرنساوي وكل المراكب كانت بتتفتش، وبعد العدوان الثلاثي، وكلنا نعرف مؤامرة العدوان الثلاثي، جت قوات الطوارئ وإحنا سبنا هذه المنطقة لقوات الطوارئ، لأن جت قوات الطوارئ بقرار من الأمم المتحدة من أجل انسحاب إنجلترا وفرنسا وإسرائيل. اليهود بيقولوا انهم فتحوا الملاحة. أنا بأقول انهم في هذا ناس كدابين وصدقوا كدبهم، وإحنا انسحبنا علشان الإنجليز والفرنسيين هجموا علينا وأن المعركة مكنتش أبداً معركة بينا وبين إسرائيل.

          برضه أنا كنت في القوات المسلحة في الأيام اللي فاتت، كل القوات المسلحة مستنية المعركة مواجهة وجهاً لوجه بين العرب وبين إسرائيل لوحدهم.

<3>