إرشادات مقترحات البحث معلومات خط الزمن الفهارس الخرائط الصور الوثائق الأقسام

مقاتل من الصحراء

     



(تابع) خطاب الرئيس أنور السادات في افتتاح الدورة الأولى للمؤتمر القومي الثاني للاتحاد الاشتراكي العربي في 23 يوليه 1971
المصدر: "قال الرئيس السادات، الجزء الأول 1971، السكرتارية الصحفية لرئيس الجمهورية، 1980، ص 182 - 193"

كلنا سواء. اذكروا معركة بريطانيا سنة 40 إزاي دخلها الشعب الانجليزي احنا مش اقل منه لاصلابة ولا أصالة ولا معاني، أبدا  ولاعقيدة احنا مش أقل منهم فى شيء، ان لم نمتاز احنا.

         فى وقت من سبعة آلاف سنة كان عندنا حضارة كانوا هناك على الشجر، وفي الكهوف فى لندن، ومكانش فيه حاجة اسمها لندن، احنا أأصل وأقدم، حاتيجى معركتنا،.. وبعدين مش احنا أول دولة خدت هزيمة أبدا، أمريكا من قبلنا، وهى قوى كبرى. جات لها اليابان من آخر الباسفيك وهى عندها الرادار والالكترون، وكل الصناعة المتقدمة جات لها اليابان من آخر الباسفيك وقضت على الأسطول الأمريكى كله فى بيرل هاربر فى ضربة واحدة.. انجلترا فى دنكرك رجعوا العساكر عرايا، مساكين، عرايا. فى دنكرك.. لكن كل هذه الشعوب وقفت وكملت المعركة وبنت.. احنا مش أقل من أى حد من دول.. سنة 1968 وبرضه لازم احطها قدامكم دى قبل ما أنسى قام البعض قال عاوزين نحقق مين المسئول..

         وباذكر أنى قريت مذكرات تشرشل وهو بيحكى عن معركة سنغافورة، وأنا حكيت عنها قبل كده عند القضاة.. تشرشل لما كتب عن معركة سنغافورة قال.. وصمة الخزى والعار فى جبين الامبراطورية العسكرية.. الوصمة العسكرية فى تاريخ العسكرية البريطانية.. والخزي والعار فى تاريخ بريطانيا.. لأنه اضطر يصدر أمر لأكثر من 30.000 عسكري وضابط انهم يسلموا بالكامل بأسلحتهم للجيش الياباني.. وسلموا فعلا بالكامل.

         بيوصفها كده أنها وصمة الخزى والعار، وقامت لان تشرشل كان بيحكم انجلترا بحكومة مؤتلفة فى ذلك الوقت من العمال والمحافظين والاحرار، وقام البعض وقال لابد من تحقيق مين المسئول ومين ومين ومين؟ ؟... تشرشل وقف وقال: ابدأ. أخلص الحرب الأول، انتهى من معركتى وبعدين نحقق.. سنة 1968 البعض قام وقال مين المسئول ونحقق و.. و.. طب ما وقف الريس جمال الله يرحمه وقال أنا مسئول، خدها بشهامة وبرجولة وما كنش هو المسئول كلية بالكامل.. يعنى ما احنا كلنا شركائه ومسئولين واللى يتنصل من مسئوليته النهارده يبقى ما يستحقش انه يقعد فى مكانه.. ما احنا كلنا كنا معاه وشركا ومسئولين. واللى كانوا موجودين لغاية سنة 1967 فى الحكم. كل واحد منهم مسئول تماما على قدم المساواة، لكن جمال كان شهم زى ما أنتم عارفين وصعيدى  وراجل.. قال أنا المسئول عن كله.. البعض يومها طلع بدعاوى يقولوا: تعالوا نحقق مين المسئول، ما كانش القصد المسئولية هى كانت عملية هدم.. أنا بقول لكم ده علشان افتح عنيكم للى كان بيجرى.

         كتنظيم أنتم النهاردة مسئولين عن الجبهة.. من أقصى الجنوب لاقصى الشمال. المعركة أولا، وقبل كل شيء. وفوق كل شيء.. وبعدين نبقى نتحاسب، قبله نخلص معركتنا.. أما تحت دعاوى عاوزين نشوف مين المسئول لسه.. ده كلام عمليات كان مقصود بها الهدم أيامها.. عاوزين نعدى المرحلة دى، ونواجه عدونا فعلا، ونخلص معركتنا، ونكمل بناءنا واحنا ماشيين بنحاسب كل واحد.. وما حناش أول دولة خدت هزيمة، ولا آخر دولة حاتاخد هزيمة، بل دول كبرى خدت هزائم أمر من اللى احنا خدناها، بس ما وقفتهاش، وماشالتهاش، وما طلعش فيها اللى يتفلسف ويقول لازم نحقق، ونقف ونسيب كل حاجة ونقول نحقق، ونسيب هناك العدو قاعد على الضفة الشرقية فى القناة.

أيها الاخوة أعضاء المؤتمر:

  • أهلا بكم لمسئوليات جديدة في العمل الوطنى.
  • أهلا بكم لمرحلة جديدة فى العمل الوطنى تواصل المسيرة وتدفع على الطريق..
  • أهلا بكم شركاء في صنع الأمل والمستقبل، لأمة تريد الحياة بكل ما تعنيه الحياة من معانى العزة والكرامة والشرف.
  • أهلا بكم فى انطلاقة هادرة لبناء شامخ  يقوم على العلم والايمان..
  • أهلا بكم فى خدمة وطنكم المصرى وأمتكم العربية.. بل أكاد أقول ومجتمعكم الانسانى الذى يحتاج إلى جهد كل شعوب الارض المتطلعة إلى عالم من السلام القائم على العدل.
  • أهلا بكم فى موكب بناء مصر العربية العظمى بالعلم والإيمان..
  • أهلا بكم من أجل إعلان البنيان وإحراز النصر. ويومئذ يفرح المؤمنون بنصر الله..

        والسلام عليكم ورحمة الله وبركاته..


<12>