(تابع) خطاب الرئيس أنور السادات أمام مجلس الشعب حول أزمة الشرق الأوسط والعلاقات بالاتحاد السوفيتي

البرلمان البريطاني كتب الكلام ده تشرشل وموجود في المكتبة ومترجم .. البرلمان البريطاني فوضه هو وأربعة وزراء سموها وزارة الحرب أن يتخذ ما يشاء من قرارات ولا يخطر بيها البرلمان إلا وقتما يرى ذلك مناسبا للمعركة.

نفس التفويض اداه له مجلس الوزراء البريطاني.

أنا باعمل العكس.. أنا بااقول لا أنا عايز التجربة الديموقراطية تنجح لأن المعركة دي معركتنا كلنا كشعب وعايزين كلنا نشتغل فيها وكلنا لأول مرة نحارب معركة إحنا حاسين كل إنسان فينا له دور فيها وعلى ذلك أنا واخد الطريق الصعب ما أنا كان ممكن أجي أطلب منكم بحكم المعركة من فضلكم أدي اللي جرى في المعارك حوالينا في العالم كله ديموقراطيات وغير ديموقراطيات أدوني تفويض لكن لا طلبته ولا حا أطلبه أبداً أنا عايز مجلس الأمة يشتغل الصعوبة اللي أنا باواجهها واللي مُصر أني أكمل التجربة بيها أن من خلال عمل ديموقراطى في أثناء المعركة لازم باذن الله نكمل تجربتنا ونكمل معركتنا إن شاء الله ده  عمل ديموقراطي في كل أجهزتنا ماشية على طول مجلس الأمة قايم بدوره ومجلس الوزراء قايم بدوره.

والتنظيم السياسي قايم بدوره التنظيمات المساعدة كل واحد يقوم بدوره ولكن ليكن معلوما من اليوم وأنا بأقرر أمامكم أني لن اسمح بمناورات.. لا مناورات.. ولا مزايدات وكمان لازم يكون فيه قواعد وضوابط للسلوك يعني مطلوب جنب نزاهة التصرفات نزاهة النوايا المسألة مش مسألة كلام.. النوايا.. القلب لازم يكون نضيف أبيض.. على سبيل المثال جيتوا انتم في موضوع الانابيب وأتقدم استجواب واتقالت فيه كل الحقائق والمضبطة بتاعة هذه الجلسة شرف لهذا المجلس وعايزها تتوزع على كل فرد في الاتحاد الاشتراكي وفي البلد فيها الرأي المعارض والرأي المؤيد بكل البيانات بكل الأمثلة بكل شيء واتخذ المجلس قراراً أية ده اللي يطلع لي تاني بعد المجلس السلطة التشريعية اللي في البلد تقوم تطلع لى هيئة من الهيئات نقابة من النقابات لسه بتناقش الموضوع علشان تاخد قرار فيه أيه ده ايه السلوك ده أيه ده قيّمين على البلد فيه أوصياء تاني على البلد بعد مجلس الأمة ما ياخد قرار ويقف الرأي المعارض يتكلم ويحط كل الحجج وييجي المجلس يتخذ قرار تطلع هيئة وصاية جديدة على البلد لسه بتناقش الموضوع أنا كنت حريص زيكم تماما وزي كل فرد في الشعب أني أعرف أية الموضوع أوله أية وآخره أية وإذا كان فيه أي تصرف لأي مسؤول وحصل أن فيه تصرفات لمسؤولين انتم طلبتم انهم يقدموا إلى الحساب ولابد أن يقدموا إلي الحساب.

لكن لما نيجي نقول ضوابط السلوك مش ممكن أبداً أبداً هيئة أو نقابة تحت أي شعار أو تحت أي اسم بعد هذه السلطة التشريعة ما تقرر وتاخد رأيها في موضوع تفتحه هناك للمناقشة تاني لا غير مقبول هذا السلوك مرفوض بالكامل يكون ده واضح عندنا وقت ما كان بيتناقش هنا أنا قلت افتحوا المجلس وهاتو جميع من يشاء وكل من يريد أن يقول كلمة هاتوه المجلس هنا في اللجان ودخلوه يقول رأيه عشان نعرف الحقيقة كلنا عايزين الحقيقة ما حدش عايز يخبي حاجة.

<15>